കരസേനയുടെ നായ ‘സൂം’ വീരവിയോഗം വരിച്ചു. ജമ്മുവിലെ അനന്ത്നാഗിൽ ഭീകരരുമായി ഏറ്റുമുട്ടുന്നതിനിടെ സൂമിന് പരിക്കേറ്റിരുന്നു. ചികിത്സയിൽ കഴിയുന്നതിനിടെ ഉച്ചയ്ക്ക് 12 മണിയോടെയാണ് ജീവൻ നഷ്ടമായത്.
ന്യൂഡൽഹി: ജമ്മു കശ്മീരിലെ അനന്ത്നാഗിൽ ഭീകരരെ നേരിടുന്നതിനിടെ പരിക്കേറ്റ കരസേനയുടെ നായ ‘ സൂം ‘ വീരവിയോഗം വരിച്ചു. അഡ്വാൻസ് ഫീൽഡ് വെറ്ററിനറി ആശുപത്രിയിൽ ചികിത്സയിൽ കഴിയുന്നതിനിടെ ഇന്ന് ഉച്ചയ്ക്ക് 12 മണിയോടെയാണ് സൂമിന് ജീവൻ നഷ്ടമായത്. 11.45 വരെ നായയ്ക്ക് അനക്കമുണ്ടായിരുന്നു, തുടർന്ന് പെട്ടെന്ന് ശ്വാസതടസം അനുഭവപ്പെടുകയും ജീവൻ നഷ്ടമാകുകയും ആയിരുന്നുവെന്ന് കരസേന അറിയിച്ചു.
അനന്തനാഗിലെ കോക്കർനാഗിൽ രണ്ട് ലഷ്കർ ഇ തൊയ്ബ ഭീകരരെ നേരിടുന്നതിനിടെയാണ് കരസേനയുടെ അസോൾട്ട് ഡോഗ് സൂമിനു വെടിയേൽക്കുന്നത്. ഞായറാഴ്ചയായിരുന്നു സംഭവം. പ്രദേശത്ത് ഭീകരർ ഒളിച്ചിരിപ്പുണ്ടെന്ന് തലേദിവസം തന്നെ സൈന്യത്തിനു വിവരം ലഭിച്ചിരുന്നു. ഇതേ തുടർന്നാണ് സ്ഥലത്തേക്കു സൂമിനെയും എത്തിച്ചത്.
ഭീകരർ ഒളിച്ചിരിപ്പുണ്ടെന്നു സംശയിച്ച വീട്ടിലേക്ക് പ്രത്യേക പരിശീലനം ലഭിച്ച സൂമിനെ അയക്കുകയായിരുന്നു. ഇതിനിടെ, ഭീകരർ സൂമിനുനേരെ രണ്ടു തവണ നിറയൊഴിച്ചു. വെടിയേറ്റിട്ടും വീഴാതെ ഭീകരരെ കീഴ്പ്പെടുത്താൻ സൂം ശ്രമം നടത്തി. ഒടുവിൽ ഇരുഭീകരരെയും സുരക്ഷാ സേന വധിക്കുകയായിരുന്നു. ഏറ്റുമുട്ടലിൽ സൂമിനു പുറമേ രണ്ട് സൈനികർക്കും പരിക്കേറ്റിരുന്നു.
സൂമിൻ്റെ സഹായത്തോടെയാണ് രണ്ടു ഭീകരരെയും വധിക്കാൻ സാധിച്ചതെന്ന് സൈന്യം അറിയിച്ചിരുന്നു. കശ്മീരിലെ വിവിധ ഓപ്പറേഷനുകളിൽ സൈന്യത്തിനൊപ്പം സൂമും പങ്കെടുത്തിട്ടുണ്ട്. രണ്ടര വയസ് പ്രായമുള്ള സൂം കഴിഞ്ഞ 10 മാസമായി കരസേനയുടെ അസോൾട്ട് വിഭാഗമായ കോർപ്പ്സ് 15 ന് ഒപ്പമുണ്ടായിരുന്നു.
