കേരള ക്രിക്കറ്റ് ലീഗ് 2025 (Kerala Cricket League 2025): രണ്ടാം ദിനത്തിലെ ആദ്യ മല്സരത്തില് തൃശൂര് ടൈറ്റന്സ് ഏഴ് വിക്കറ്റിന് ആലപ്പി റിപ്പിള്സിനെ (Alleppey Ripples vs Thrissur Titans) തോല്പ്പിച്ചു.
കേരള ക്രിക്കറ്റ് ലീഗ് ( Kerala Cricket League 2025 ) രണ്ടാം സീസണില് തൃശൂര് ടൈറ്റന്സിന് വിജയത്തുടക്കം. ആലപ്പി റിപ്പിള്സിനെ ( Alleppey Ripples vs Thrissur Titans ) ഏഴ് വിക്കറ്റിന് തോല്പ്പിച്ചു. മുഴുവന് ടീമുകളുടെയും ഓരോ മല്സരങ്ങള് പൂര്ത്തിയായപ്പോള് കൊച്ചി ബ്ലൂ ടൈഗേഴ്സ്, തൃശൂര് ടൈറ്റന്സ് , ഏരീസ് കൊല്ലം സെയ്ലേഴ്സ് എന്നീ ടീമുകള് രണ്ട് പോയിന്റ് വീതം നേടി.
ടോസ് നഷ്ടപ്പെട്ട് ബാറ്റ് ചെയ്ത ആലപ്പി 20 ഓവറില് ഏഴ് വിക്കറ്റിന് 151 റണ്സ് ആണ് നേടിയത്. തൃശൂര് 16.3 ഓവറില് മൂന്ന് വിക്കറ്റ് നഷ്ടത്തില് 152 റണ്സ് നേടി വിജയിച്ചു.
ഓപണര്മാരായ ആനന്ദ് കൃഷ്ണന് , അഹമ്മദ് ഇമ്രാന് എന്നിവരുടെ സെഞ്ചുറി കൂട്ടുകെട്ടാണ് (12.4 ഓവറില് 121) തൃശൂരിന് അനായാസ ജയം സമ്മാനിച്ചത്. ആനന്ദ് കൃഷ്ണന് 39 പന്തില് 63 റണ്സും അഹമ്മദ് ഇമ്രാന് 44 പന്തില് 61 റണ്സും നേടി.
ഷോണ് റോജര് (10) ആണ് തൃശൂരിന് നഷ്ടമായ മൂന്നാമത്തെ വിക്കറ്റ്. അക്ഷയ് മനോഹറും (10*) അര്ജുന് (1*) എന്നിവര് ചേര്ന്ന് ചടങ്ങ് പൂര്ത്തിയാക്കി. ആലപ്പിക്ക് വേണ്ടി വിഗ്നേഷ് പുത്തൂര് രണ്ട് വിക്കറ്റ് നേടി.
ആദ്യം ബാറ്റ് ചെയ്ത ആലപ്പി റിപ്പിള്സിനായി കേരളത്തിന്റെ രഞ്ജി ട്രോഫി താരങ്ങളായ അക്ഷയ് ചന്ദ്രന്, ജലജ് സക്സേന എന്നിവരാണ് ഇന്നിങ്സ് ആരംഭിച്ചത്. ഇരുവരും വേഗത്തില് പുറത്തായി. രണ്ട് വിക്കറ്റുകളും അനന്ദ് ജോസഫിനാണ്.
ഇന്നിങ്സിലെ രണ്ടാം ഓവര് എറിഞ്ഞ അനന്ദ് അവസാന പന്തില് പ്രമുഖ ഓള്റൗണ്ടര് ജലജ് സക്സേനയെ വീഴ്ത്തി. തന്റെ രണ്ടാം ഓവറിലെ രണ്ടാം പന്തില് അനന്ദ് അക്ഷയ് ചന്ദ്രനേയും പുറത്താക്കി. ജലജ് സക്സേന എട്ട് റണ്സും അക്ഷയ് ചന്ദ്രന് ഏഴ് റണ്സുമാണ് നേടിയത്.
മൂന്നാമനായി ക്രീസിലെത്തിയ ക്യാപ്റ്റനും വിക്കറ്റ് കീപ്പറുമായ അസ്ഹറുദ്ദീന് ഉത്തരവാദിത്തത്തോടെ ബാറ്റ് വീശി. കൂട്ടിനെത്തിയ അഭിഷേക് നായര് (14), അനുജ് ജോട്ടിന് (11), അക്ഷയ് ടികെ (2) എന്നിവര് പുറത്തായെങ്കിലും അസ്ഹറുദ്ദീന് സ്ട്രോക് പ്ലേ തന്നെ പുറത്തെടുത്തു. 38 പന്തില് മൂന്ന് സിക്സറുകളും മൂന്ന് ബൗണ്ടറികളും സഹിതം 56 റണ്സെടുത്ത ശേഷമാണ് പിടികൊടുത്തത്. സിബിന് ഗിരീഷിനാണ് വിക്കറ്റ്.
17ാം ഓവറില് ബാലു ബാബു (3) കൂടി പുറത്തായതോടെ ഏഴിന് 110 എന്ന നിലയിലായി. ഓവര് പൂര്ത്തിയാവുമ്പോള് ശ്രീരൂപ് (23 പന്തില് 30), ആദിത്യ ബൈജു (11 പന്തില് 12) എന്നിവരാണ് ക്രീസിലുണ്ടായിരുന്നത്. അവസാന ഓവറുകളില് അല്പമെങ്കിലും റണ്സ് നേടിയത് ശ്രീരൂപ് ആണ്. എന്നാല് തൃശൂരിനെ തളയ്ക്കാന് ഇതൊന്നും ഒട്ടും പര്യാപ്തമായിരുന്നില്ല.
തൃശൂരിന് വേണ്ടി സിബിന് ഗിരീഷ് നാല് ഓവറില് 23 റണ്സിന് നാല് വിക്കറ്റ് വീഴ്ത്തി. ഈ പ്രകടനമാണ് ആലപ്പിയുടെ ബാറ്റിങിന്റെ നട്ടെല്ല് തകര്ത്തത്.
