UAE School Hours: ഈ വർഷം മുതൽ യുഎഇയിലെ സ്കൂളുകളുടെ സമയത്തിൽ മാറ്റം വരുമെന്ന തരത്തിലാണ് സോഷ്യൽ മീഡിയയിൽ പ്രചരണം നടക്കുന്നത്. ഈ ഘട്ടത്തിലാണ് മന്ത്രാലയം തന്നെ വിശദീകരണം നൽകിയത്
ദുബായ്: പുതിയ അധ്യായന വർഷം ആരംഭിക്കാനിരിക്കെ സർക്കാർ സ്കൂളുകളിലെ പഠന സമയം മാറ്റുമെന്ന തരത്തിലുള്ള പ്രചാരണങ്ങൾ അടിസ്ഥാനരഹിതമാണെന്ന് യുഎഇ വിദ്യാഭ്യാസ മന്ത്രാലയം . കിന്റർഗാർട്ടൻ തലത്തിൽ പോലും സമയക്രമത്തിൽ മാറ്റമില്ലെന്നും മന്ത്രാലയം വ്യക്തമാക്കി. വ്യാജ വാർത്തകൾ പ്രചരിപ്പിക്കുന്നത് ഒഴിവാക്കണമെന്നും, മന്ത്രാലയത്തിൻ്റെ ഔദ്യോഗിക അറിയിപ്പുകൾ മാത്രം പിന്തുടരണമെന്നും അധികൃതർ അറിയിച്ചു.
കഴിഞ്ഞ കുറച്ചുദിവസമായി യുഎഇയിൽ സർക്കാർ സ്കൂളുകളുടെ പഠന സമയം മാറ്റുമെന്ന റിപ്പോർട്ടുകൾ പ്രചരിച്ചിരുന്നു. ഈ സാഹചര്യത്തിലാണ് വിദ്യാഭ്യാസ മന്ത്രാലയം വിഷയത്തിൽ വ്യക്തത വരുത്തിയത്. സ്കൂൾ സമയക്രമം മാറ്റുന്നതിനെക്കുറിച്ച് ഔദ്യോഗികമായി ഒരു വിവരവും നൽകിയിട്ടില്ലെന്ന് മന്ത്രാലയം അറിയിച്ചു. തെറ്റായ വിവരങ്ങൾ പ്രചരിപ്പിക്കുന്നത് ഒഴിവാക്കാൻ പൊതുജനങ്ങൾ ശ്രദ്ധിക്കണം.
മന്ത്രാലയം തങ്ങളുടെ ഔദ്യോഗിക വെബ്സൈറ്റുകളിലും, സോഷ്യൽ മീഡിയ അക്കൗണ്ടുകളിലും നൽകുന്ന വിവരങ്ങൾ മാത്രം വിശ്വസിക്കുക. കൃത്യമായ വിവരങ്ങൾക്കായി മന്ത്രാലയത്തിൻ്റെ വെബ്സൈറ്റ് സന്ദർശിക്കണമെന്നും അധികൃതർ അറിയിച്ചു.
2025-2026 അധ്യയന വർഷത്തിലെ സർക്കാർ സ്കൂളുകളിലെ സമയക്രമം താഴെ നൽകുന്നു:
– കിന്റർഗാർട്ടൻ: തിങ്കൾ മുതൽ വ്യാഴം വരെ രാവിലെ 8 മുതൽ ഉച്ചയ്ക്ക് 1 വരെ. വെള്ളി രാവിലെ 8 മുതൽ 11.45 വരെ.
– സൈക്കിൾ 1 (Option 1): തിങ്കൾ മുതൽ വ്യാഴം വരെ രാവിലെ 7.15 മുതൽ ഉച്ചയ്ക്ക് 1.25 വരെ. വെള്ളി രാവിലെ 7.15 മുതൽ 10.35 വരെ.
– സൈക്കിൾ 1 (Option 2): തിങ്കൾ മുതൽ വ്യാഴം വരെ രാവിലെ 8 മുതൽ ഉച്ചയ്ക്ക് 2.20 വരെ. വെള്ളി രാവിലെ 8 മുതൽ 11.45 വരെ.
– സൈക്കിൾ 2 & സെക്കൻഡറി – ആൺകുട്ടികൾ: തിങ്കൾ മുതൽ വ്യാഴം വരെ രാവിലെ 7.15 മുതൽ ഉച്ചയ്ക്ക് 2.15 വരെ. വെള്ളി രാവിലെ 7.15 മുതൽ 10.35 വരെ.
– സൈക്കിൾ 2 & സെക്കൻഡറി – പെൺകുട്ടികൾ: തിങ്കൾ മുതൽ വ്യാഴം വരെ രാവിലെ 8 മുതൽ വൈകുന്നേരം 3.15 വരെ. വെള്ളി രാവിലെ 8 മുതൽ 11.45 വരെ.
